Oyunu “Kipl” + “Vista” aparmalıydı. Amma nədənsə, ikincinin ancaq bir neçə suallarını eşitdik.
Aparıcılar (yəni, yalnız “Kipl”lilər) bu dəfə qaydalarla çox uğraşmadılar. Bu da keçən dəfəkinə nisbətən daha yaxşı effekt verdi. Zala bir az tez gələndə Elgünün artıq hazırlığa başladığını görəndə, sualların daha keyfiyyətli olacağını düşündüm. Amma bu məsələdə keçən dəfəki vəziyyət təkrar olundu. Keyfiyyət baxımından Orxan Cəlilovdan üstünlüyü yenə də his olundu. Cəlilov artıq klubumuzun stabil sual müəllifi olduğunu sübuta yetirib. Ancaq sualları həddən artıq asan idi. Elgünün səsləndirdiyi bir neçə sualın (“Farenheyt”, “Almaniyanın qələbəsi”, “Vaqif dramı” və s.) hansı meyarla sual adlandırmaq olduğunu başa düşmədim. “Vista”nın son sualını (“Mafiyanın ədaləti”) da anlamadım. Klubda hazırda cərəyan edən futbol üzrə Avropa çempionatına dair sualların səslənməsi və oyunçularda futbol ab-havası sürməsi diqqət çəkir.
Nizam-intizam nisbətən yaxşı idi. Hər halda başım o qədər də ağrımadı. Bəlkə də komandalara arxa çevirdiyim üçün səs-küyü hiss etmədim. Oyunda o qədər də güclü rəqabət olmadı. “Fatehlər” rəqiblərini üstələdilər və qalib gəldilər. “Cihad”la “Diplomat” yalnız izləmə mövqeyi tutdular. İkinci liqada “Ergenekon”un artıq ənənəyə çevrilən stabil çıxışı yadda qaldı.

Hazırladı Aqşin Atalızadə

Oyunu "BİM Yunayted" və "Sakit" apardı. Seymur Teymurovun fikrinə qoşularaq bildirirəm ki, artıq gələn dövrədən iki komandanın oyun aparması tendensiyasına (Nicat islahatı) son qoymaq lazımdı.
Suallar: Sakit - yozumsuz, "BİM Yunayted" - turnirdən sonra yalnız sual xətrinə sualların olacağı aydın idi.
Aparıcılıq: Əvvəlki oyunların şərhinə bax + məddahnamələrində mənə də yer ayırdığına görə Eminova təşəkkür edirəm.
İntizam: Əvvəlki oyunların şərhinə bax.
Oyunun gedişi: Zal elə bil ki, boş idi. Bunu yay imtahan sessiyalarının başlanması ilə də izah eləmək olar. Amma heç də yaxşı əlamət deyil. "Cihad" komandası özünü Eminovun şüuru səviyyəsinə lazımınca endirə bilməyi bacardığından inamlı qələbə qazandı – 15 xal. "KİPL"-in də Fuadı yaxşı tanıdığı aydın oldu – 12. Qalanları isə zülm çəkdilər. Birinci liqada "Ergenokan"a rəqib tapılmadı - 11

Aqşin Atalızadə

Gözəl suallar oyunu idi.
Komandaların hər ikisini təbrik eləyirəm. Xüsusən "Cihad"ı. "Dream-Team" inciməsin. Bugünkü oyunun əsas nitq hissələri Cihadın oyunçularıydı.
Başlayaq qüsurlardan. Paketlər yenə ayrı idi. "Cihad"da isə üç paket və yazılmamış suallar vardı. Nəticədə lazımi formada həkk olunmamış suallar o qədər də yaddaqalan olmadı.
Bugün gözəl suallar günü idi. "Cihad" komandasına, əsasən də Tural Dadaşova əlimdən yalnız təşəkkür etmək gəlir. Adi dövrə oyunlarına hər dəfə gözəl və baxımlı suallar çıxarmaq çətin işdi. Yadımda 3 gözəl sual qalıb: «Paxır», «Arximed» və «Abort». Əslində suallara gözəllik qatan faktlar deyil, onun tərtib olunma formasıdır. Məhz bunun bəzilərinə gözəl sual deyirik, digərləri isə heç yadımızda qalmır. Oktay Məhərrəmova görə «Paxır» başqa cür formula edilsəydi, daha asan olardı. Ancaq, fikrimcə, «Paxır»da hər hansı bir dəyişiklik, onun «paxır»ını açardı. Təəssüf ki, komandalar sadəcə olaraq anadolu leksikonundan istifadə edərək sualı tapdılar.
«Arximed»in müəllifinin şeirdə sual elementlərini tapması və onu lazımi formada tərtib etməsi yaxşı effekt verdi.
«Abort» isə bəzi komandaların kinayəli gülüşlərinə baxmayaraq sadəcə GÖZƏL sual idi.
"Dream-Team"in suallarının bir qüsuru var idi, o da «Cihad»dan geri qalması. Əslində normal suallar idi. Sadəcə olaraq komandanın sualları yaxşı formula etmək bacarığı hələ formalaşmayıb.
Nizam-intizam isə yenə də yerində deyildi. Aparıcılardan xahiş edirəm ki, gələcəkdə ümumi sakitlik yaratsınlar, ondan sonra sualları elan etsinlər. Bəzi sualların əvvəlini, bəzilərinin isə axırını eşitmək olmurdu. Ümumiyyətlə, klubda insanı dəli edəcək səviyyədə səs-küy var. Burda məşhur Ağanatiqin sözləri yadıma düşdü: "Deyəsən, mənim kimi qocalmaq istəyirsiniz….. İstəmirsinizsə, sakit olun". Başqalarını bilmirəm, mən yalnız ilk 5-6 suala normal başla qulaq asıram.
Qeyd etmək lazımdır ki, bugünkü oyunda komandaların azlığı diqqət çəkdi. Elə ümumi baxışla da zalda boşluq olduğu görünürdü. Seymur Teymurovun gəlişi də bu boşluğu doldurmadı. Oyunun gedişi gözlənilən kimi oldu. İlk suallardan sonra ənənəvi olaraq aydın gözəçarpan lider yox idi. Lakin, son turnir qalibi «KİPL»in geniş heyətlə çıxış etməsi, onların qələbəsini gözlənilən etmişdi. «Fatehlər» və «Diplomat»ın əsas rəqiblərinə çatmaq ehtimalı az idi. Nəticədə «KİPL» əsas rəqiblərini xeyli qabaqlayaraq 14 xalla inamlı qələbə qazandı.
Aşağı liqada komandalarla birlikdə rəqabətin də azalması davam edir. Yenə də Ergenekonun zəif çıxışı zəminində Fortuna qalib gəldi.

Hazırladı Aqşin Atalızadə

Nəhayət ki, uzun deyişmələrdən sonra dövrəni başlaya bildik.
Təəssüf ki, qeydiyyat aparmadım. Bugünkü oyunu Fatehlər+Rüfət+İstiqlaliyyət 6 adlandırmaq olar.
Aparıcılarla bağlı uzun müddət davam edən deyişmələr onunla nəticələnmişdi ki, komandalar oyuna hazırlıqsız idilər. Faktiki 3 paket vardı. Emin, Əli və Rüfətin paketi, sonuncuya əgər paket demək olarsa. Əvvəlcə kompüterdən anlaşılmaz nəsə oxumağa çalışdı, sonra da nəsə sual verdi. Doğrudan da başa düşmək olmur. Rüfət Fatehlərin üzvü deyil? Tutaq ki, həmkar komanda məlum deyildi. Bir komandanın daxilində ki, vahid suallar paketi yaratmaq olardı?
Suallar əvvəlcə çətin başladı. Bir qayda olaraq çətin suallara həm də yaxşı sual deməyə vərdiş etsək də, bugünkü oyunda bu hiss olunmadı. Yalnız «Mənim Tanrım gözəllikdir, sevgidir» blitsini çıxmaq şərti ilə yadda qalan sual olmadı. XIX əsrdə Britaniya müstəmləkəsi olan Hindistanda Britaniya səfirliyinin olması faktını yoxlamaq lazımdır. Eskort-ekskortun da ki, heç yeri yox idi. İstiqlaliyyət-6-nın sualları nisbətən zəif olması ilə seçilirdi.
Nizam-intizam yerində deyildi. Aparıcılar həddindən artıq biganə idilər. Yersiz reaksiyalar da vardı. Bir şeyi qəti demək olar: bu oyun «Fatehlər»in keçirdiyi ən pis oyun idi.
Oyunun gedişi bir az gözlənilməz oldu. İlk çətin suallardan sonra cəmi bir neçə komandanın aktivində xal var idi. Əsas mübarizə 12-18-ci suallar arasında qızışdı. Kapitansız «KİPL» yaxşı təsir bağışlamadı. Elə kapitansız «Sakit»in də səsi çıxmırdı. Nəticədə birincilik «Cihad»la yeni tərkibli «Diplomat»ın arasında baş verdi. Son sualın sayəsində «Diplomat» rəqibinə çatdı və nəticədə hər iki komanda bərabər nəticə göstərdilər - 10 xal.
Aşağı liqada komandalarla birlikdə rəqabətin də azalması müşahidə edilir. Bu heç yaxşı əlamət deyil. Ergenekonun zəif çıxışı zəminində Fortuna qalib gəldi.
Bütövlükdə oyun aşağı göstəricilərlə yadda qaldı.

Hazırladı Aqşin Atalızadə

Yaxşı oyun idi.
«Kipl» += «Triumf» oyununu bütövlükdə iki cəhətdən qiymətləndirmək lazımdır: mənfi – aparıcılıq və müsbət - suallar.
Aparıcıların yeganə müsbət cəhəti oyunu aydın, uca səslə aparmaları idı. Ancaq oyun başlayan kimi problemlər başladı. Məlum oldu ki, suallar gətirilməyib. Aparıcıların bir qrupu sualların dalınca getdiyi vaxtda Tural Sultanov komandaların qeydiyyatı ilə məşğul olmağa çalışdı. Amma çalışdı, çünki suallar gələnə qədər bu prosesi başa çatdıra bilməmişdi. Turala məsləhət: bundan ötrü çalışmaq lazım deyil, komandaların özləri başa düşməlidirlər ki, qeydiyyatdan keçmək lazımdı. Bu oyunda bir ilk tətbiq olundu. Cavabların yalnız vaxtın bitməyinə 10 saniyə qalmış qəbul edilməsi. Fikrimcə çox düzgündür. Belə ki, bəzi komandaların sualları tez bilərək, cavab kartlarını aparması digər komandalarda müzakirə prosesini pozur. Həm rəqibin artıq cavab verməsi təşviş yaradır, həm də diqqəti yayındırır. Ancaq, bu ilk o qədər də düzgün tətbiq olunmadı. Tələbə riayət etməyən komandaların sadəcə kartlarının qəbul edilməməsi kifayət idi. Amma Elgün Atalıyevin bu zaman səsini ucaltmasının yalnız ona ziyanı oldu. Aparıcı komanda mümkün qədər əsəblərini qorumalıdır.
Aparıcılar bu «ilk»i hesablamada problem yaranmasının qarşısını almaq məqsədilə etdiyini bildirsələr də, hesablama prosesinin ləng aparıldığı hiss olunurdu. Aparıcılar kifayət qədər idi, səlahiyyət bölgüsü də vardı. Problem yaranmamalı idi.
Suallara heç bir irad ola bilməzdi. Bu cəhətdən komandaların hazırlığı hiss olunurdu. Keyfiyyət baxımından Orxan Cəlilovdan üstünlüyü hiss olunurdu. Cəlilova təşəkkür etmək istərdim. Onun sualların həm çətinlik dərəcəsini, həm də səviyyəsini yüksəltməsini təqdir edirəm. Ümumilikdə klubda sualların səviyyəsi artırılmalıdır. Bu, həm də bilicilərin yaddaşlarının təzələnməsinə deyil, biliklərini daha da artmasına xidmət edir. Klub yarandığı gündən oyunlarda iştirak etsəm də, 4 sualın cavabından ümumiyyətlə xəbərim yox idi (məsələn, «Boris Akunin», «stəkanda fırtına» cavablı sual). Bir neçə oynanmış sual olmasını çıxmaq şərtilə ümumilikdə sualları yüksək qiymətləndirmək lazımdır. Əlvan-Elgün deyişməsini çıxmaq şərtilə, nizam-intizamla bağlı o qədər də problem yox idi.
Bütövlükdə oyun yenə həmişəki kimi güclü rəqabət şəraitində cərəyan etdi. Suallarda çətinliyin artması daha təcrübəli və bilikli komandaların fərqi artıraraq irəli keçməsinə gətirib çıxardı. Yüksək liqada əsas mübarizə «Cihad»la «Fatehlər» arasında cərəyan etdi. «KİPL»in aparıcı komanda olması «Fatehlər»in çempionluğu üçün əlverişli şərait yaratdı. Orta nəticə kifayət etsə də, komanda var qüvvəsini sərf edərək çempion oldu. Əvvəlki turların «flaş» komandası «İstiqlaliyyət – 6» nın natamam heyətdə olması onun bu tur zəif çıxış etməsinə gətirib çıxardı. Aşağı liqada «Vista» komandasının uğurlu çıxışı gözlənilməz oldu. Ötən turun qalibləri BİM-Yunayted və «Ergenekon»un zəif çıxışı diqqət çəkdi.

Hazırladı Aqşin Atalızadə

Hörmətlə Admin

12-cü dövrənin nəticələri

13-cü dövrənin nəticələri

23 dekabr 2007-ci il tarixində "Trend" İnformasiya Agentliyi və "Xəzər" İntellektual Klubu hər iki təşkilat arasında məhsuldar əməkdaşlığın növbəti nəticəsi olan "Nə? Harada? Nə zaman?" intellektual oyunu üzrə "Trend" kuboku turniri keçirəcəkdir.

Dekabrın 1 və 8-də turnirdə iştirak etmək arzusunda olan ali məktəblərin komandaları və sair komandalar arasında seçim turları keçiriləcəkdir. Seçim turlarında ən yaxşı nəticələri göstərən komandalar turnirin final mərhələsinə vəsiqə qazanacaqlar.

Turnirdə iştirak etmək istəyən komandalar noyabrın 27-dək "Xəzər" İntellektual Klubunun prezidenti cənab Seymur Teymurovla əlaqə saxlamaqla və ya Fuad Eminova feminov@list.ru mail ünvanına yazmaqla seçim turunda öz iştiraklarını təsdiqləməlidirlər.

Qızıl payız dövrəsi də belə getdi. Əslində bu dövrə son illər keçirilən dövrələr arasında xüsusi fərqlənməlidir. Bu dövrə debyutantların səviyyə fərqini aradan qaldırması ilə yadda qaldı. Yüksək liqanın debyutantları olan Karvan və İstiqlaliyyət 6 Yüksək liqada öz yerlərini saxladı. Dumanlı Təbrizin öz yerini verdiyi Sakit komandası isə hətta II yerədək irəliləyə bildi. Güclü rəqabət perspektivli Fatehlərin II liqaya düşməsinə səbəb oldu. Cihad kimi təcrübəli komanda isə dövrənin son iki oyununda qazandığı xallar hesabına öz adını və nüfuzunu qoruya bildi.

Bu dövrə həm də aparıcıların sual paketlərinin keyfiyyəti sahəsində baş verən irəliləyişlərlə yadda qaldı. Sakit, Diplomat-Triumf, Bim utd-İstiqlaliyyət 6 komandalarının sualları yüksək qiymət aldı. Tənqidlərə məruz qalsa da, qeyd etmək lazımdır ki, Fatehlər komandası da yaxşı suallar hazırlamışdı, lakin təcrübəli Karvanın bir qədər axıradək işlənməmiş sualları həmin cütlüyün suallarının tənqidlərə məruz qalmasına səbəb oldu. Cihad komandasının apardığı oyun ən zəif oyun kimi qiymətləndirilməsi isə təəssüf doğurmalıdır, çünki Cihadlılar apardıqları oyundan bir neçə həftə sonra təşkil olunan Çağırış-II kubokunda yaxşı sualların müəllifləri kimi tanınmışdırlar. Deməli, istək olan yerdə istənilən uğuru da qazanmaq mümkündür. Ümid edirik ki, gələn dəfə onlar aparacaqları dövrə oyununa daha diqqətlə yanaşacaqlar.

Dövrənin sonuna yaxın Xəzərdə həqiqətən sakitçilik yarandı. Sakit-Alfa və Diplomat-Triumf cütlüklərinin apardıqları oyunlar aparıcıların daha az sayda əsəb hüceyrələrinin məhv olması ilə yadda qaldı.

Dövrə nəticəsində ilk üç yeri tutan komandalara gəldikdə isə, çempion Triumf stabil oyunun uğurun əsas amili olduğunu göstərdi. Üç oyun dalbadal ikinci yerləri tutaraq 8 xal qazanan Sakit elə son nəticədə də II oldu. Dövrədə elektrokardioqrammanı xatırladan oyunu ilə yadda qalan Diplomatın gücü üçüncülüyə yetdi.

Yüksək liqada İqtisad Universitetinin təmsilçiləri qismində oynayan İstiqlaliyyət 6 və Bim utd isə həmin universitetin artmaqda olan intellektual səviyyəsinin əyani göstəriciləridir.

İrəlidən qış gəlir. Görək qış dövrəsi bizə nə sürprizlər hazırlayır. Düzü Yüksək Liqanın debyutantlarından qeyri-adi heç nə gözlənilməsə də, onlar yəqin ki verilən belə skeptik qiymətlə razılaşmayıb nəsə edəcəklər...Təki beyinlər qış yuxusuna getməsin.

Hörmətlə, Э.F.

    29 sentyabr “Xəzər İntellektual Gənclər Klubu”nun 2001-ci ilin aprel ayından başlayan tarixində növbəti oyun dövrəsinə “start” verilməsi ilə əlamətdar oldu. Bir həftə əvvəl Bakı Dövlət Universitetində bomba olduğu barədə yalan məlumatın verilməsi dövrə oyunlarının başlanmasını növbəti həftəyədək təxirə salsa da, bu heç də oyunçuların həvəsini azaltmamışdı. Oyunun nəticələri də bunu deməyə əsas verir. Son 3 ildə ilk dəfə komandalardan biri, konkret olaraq “El Classico” 25 sualdan 20-ni tapmağa nail oldu. Sonuncu dəfə belə bir uğuru “Cihad” komandası 24 sualdan 21-nə cavab verməklə göstərmişdi, o vaxt sualların müəllifi adı klubumuzun tarixinə yazılan “Sprut” komandası idi.

    Bugünkü oyunda sualları “Cihad” və “Dream Team” komandaları hazırlamışdı. Oyunun gedişində birinci tur gərgin mübarizə ilə yadda qalsa da, ikinci tur həm birinci, həm də ikinci liqada bir neçə komandanın digərlərini geridə qoyması ilə bir az canlandı. Müvafiq olaraq “Diplomat” və “El Classico” komandaları birinciliyə yiyələndilər. Birinci liqanın debütantları “İstiqlaliyyət – 6”, “Sakit” və iki illik ayrılıqdan sonra birinci liqaya qayıdan “Karvan” da layiqli oyun nümayiş etdirdilər. Birincilər yalnız diplomatlardan geri qalsalar da, “Karvan” komandası “BİM United” və “Triumf”la birlikdə 3-5-ci yerləri bölüşdürdü. “Sakit” isə 6-cı olaraq “Fatehlər” və “Alfa” ilə bərabər son üç yeri paylaşdı.

    Üçüncü liqada isə ikihakimiyyətlilik var, “Dəyanət” və “Heksoqon” komandaları 1-2-ci yerləri bölüşərək gələn dövrəni ikinci liqada keçirəcəklərini isbatlamağa çalışdılar.

   12 mayın ümidverici dəqiqələri... Baharın növbəti anı... Oyun gecikir, məsullar bilir ki, görüş yerini dəyişmək olmaz. Qəhrəmanlar nə Ştirlits, nə də Müllerdir. Yeni dövrün qəhrəmanları – aparıcı komandalar “Dumanlı Təbriz” və “Dream team”dir. İnisialları əkiz olan bu iki həmkar komandanın oyun günü tifaqı dağıldı. Birtəhər Rüfət Abdullanın tərtibatçısı olduğu yarımçıq və natamam sual paketinin qırıntıları hazır məhsul halına gətirildi. Saysız-hesabsız çatlara rəğmən...

   Oyunun ilk dəqiqələrindən aşkar liderlik heç kimin nəsibi olmadı. Hər xal uğrunda dişi-dırnağı ilə didişən komandalardan daha inadkarı “Cihad” oldu. “Mücahid”lər “müqəddəs vuruş” nəticəsində I pilləyə yaşıl bayraqlarını sancdılar. II pillə “Birləşmiş İqtisadiyyat Məliklikləri”nin “şeyx”lərinə qismət oldu. Yəqin anladınız ki, söhbət “Bim Yunayted” kollektivindən gedir. Son dövrə çempionu “Diplomat” komandası, deyəsən, arxayınçılığın qurbanı oldu.

   II Liqada əlverişsiz mühitə uyğunlaşmaqda mahir olan “Karvan” komandası birinciliyin ipini əldən buraxmadı. II yeri “İstiqlaliyyət 6” komandası ələ keçirdi. Müasir anlamda istifadə etsək, ünvanlı gəldin, ünvansız qaç!

   Bu dövrədən yenidən mövcudiyyətini davam etdirən III Liqada “beyin fırtınası” coşdu. Nəticədə, zirvədə “Breyn storm” komandasının küləkləri vıyıltı qopardı. II yeri “WOW” və “XD” komandaları bölüşdürdülər.

   Son mövsümün ilk oyununu da arxada qoyduq. Arxada qalanları ilklərə qurban verib irəli şığımağda davam edirik...

    Bu həftə Klubumuzda qeyri-rəsmi oyun keçiriləcəkdir. 5 may 2007-ci il, şənbə günü Klubumuzda keçirilməli olan XII dövrənin ilk rəsmi oyunu “Nə? Harada? Nə zaman?” üzrə Azərbaycan Çempionatının təşkili səbəbindən təxirə salınır. “Dumanlı Təbriz” və “Dream team” cütlüyünün aparacaqları dövrə oyunu isə növbəti şənbə, 12 may 2007-ci ildə baş tutacaq. Respublika çempionatında iştirak edəcək komandalarımıza uğurlar arzu edirik

    Dövrənin sonuncu oyununu da aprel ayının aldadıcı təbəssümləri altında başa vurduq. “Xəzər” hər mövsümün qurtaracağında olduğu kimi bu dəfə də kükrəməyə başladı. Kimisə qoynunda gizlətdi, kimisə də dalğaları üzərinə qaldırdı.

    Müxtəsər, şturmanlığı boyunlarına alan “Veni Vidi V ici” və “Kraniya” komandaları gəmini sahilə yaxınlaşdırdılar. Suallar pis tərtib olunmamışdı. Əla da deyildi. Klubda ənənəvi şəkildə cərəyan edən səs-küy epidemiyası və bu “taun”a qarşı inadkarlıq antibiotiki ilə silahlanmış aparıcı – Seymur Teymurov, birdə ki, arada sağlamların turnir müqəddəratını sarsıdan anlaşılmaz vəziyyət. Bu da son oyun gününün panoraması...

    Fırtınalı oyunun sonu “Diplomat” komandasının I yeri qazanması ilə əlamətdar oldu. Dalğaların qayaları ortadan parçaladığı kimi II pilləni də “Cihad” və “Dumanlı Təbriz” komandaları eynən iki yerə böldülər.

    II Liqada bu dövrə ambisialı və baxımlı oyun göstərən “Dream team” və tısbağa yerişindən əl çəkən “Genosid” komandaları I yeri bölüşdürməkdə əməl sahibi oldular. II pillədə dövrə ərzində qeyri-stabil oyun göstərən “Heksoqon” komandasının altı bucağı parladı.

    Nəhayət, dövrə oyununun son nəticələrinə nəzər salaq. Mümkün 40 xaldan 38-ni öz balansına yazan gənc “Diplomat” komandası çempionluğu bayram etdi. “Novruz Kuboku”nun qisası bu cür alındı. Güclülər dəstəsini yeniyetmə, lakin heyətində bir “ağsaqqalı” rezerv qüvvə kimi saxlayan “Sakit” və Vereşaginin “Müharibənin apofeozu” əsərindən ilhamlanan “Kraniya” komandaları tərk etdilər. Yüksək Liqaya bu yerə çoxdan acımış “Dream team” və elitaya can atmağa fədakarlıq göstərməyən gözütox “Alfa” komandaları vəsiqə qazandılar.

    Qədərə razı olmaq tərifəlayiq və vacibdir, ancaq işartı sezilən halda olanla kifayətlənməmək fatehlik əlamətidir.

    31 mart - 1 aprel 2007-ci ildə “Xəzər” İntellektual Klubu və Azərbaycan Dillər Universitetinin təşkilatçılığı altında “2007-ci il Gənclər İlidir” devizi altında İntellektual Çoxnövçülük üzrə “Novruz Kuboku” keçirildi. İntellektual Çoxnövçülüyə “Fərdi Oyun”, “Erudit Kvartet” və “Nə? Harada? Nə zaman?” intellektual yarışmaları daxil idi. Kubok “Fərdi Oyun” yarışması ilə başlandı. Oyunçuların fərdi intellekt göstəricilərinin əsas rol oynadığı yarışmada Tural Dadaşov qalib gəldi. İntellekt cəngavərlərinin beyinləri “soyumamış” “Erudit Kvartet” komanda yarışmasına start verildi. Bu turnirdə “Dumanlı Təbriz” komandası hamıdan güclü oldu.

    Ailəvi İstirahət Mərkəzində keçirilən “Nə? Harada? Nə zaman?” turniri isə aprelin 1-nə təsadüf etdi. “Nə? Harada? Nə zaman?” turnirində 37 komanda iştirak edirdi, iştirakçıların sayı isə 200-dən çox idi. “Gülüş günü” bir yerə toplanmış bilicilər gülməkdən çox, düşünməyə üstünlük verdilər. “Bölgələrin intellektual hərəkata cəlb olunması” layihəsi yönündə atılan növbəti addım ölkənin düşünən beyinlərinin paytaxtda cəmlənməsinə səbəb oldu. Turnirdə nəinki Bakını təmsil edən komandalar, həmçinin Gəncə, Mingəçevir və Sumqayıt şəhərlərinin kollektivləri də çıxış edirdi. Əvvəlcədən gözlənildiyi kimi Kubokun favoritləri “Dumanlı Təbriz”, “Diplomat”, “Veni Vidi Vici”, “Sprut”, “Karvan”, “Turan” və “Triumf”çox yüksək peşəkarlıq səviyyəsi göstərdilər.

    “Nə? Harada? Nə zaman?” turniri çox gərgin mübarizə ilə yadda qaldı. Suallar səsləndikcə, oyun marafonu sona yaxınlaşdıqca komandaların bir-biriləri ilə necə rəqabət apardığının şahidi olmaq olurdu. Nəticədə, bilicilərə təqdim olunan 36 sual sonunda yalnız III yerin sahibi bəlli oldu. Bu Fərrux Hüseynovun kapitanı olduğu “Triumf” idi. “Diplomat” və “Dumanlı Təbriz” komandalarının isə xalları bərabər olduğundan əlavə suallara ehtiyyac duyuldu. Rüfət Abdullanın katipanı olduğu “Dumanlı Təbriz” bu nəfəskəsici mübarizədən qalib ayrılaraq “Novruz Kuboku”-na sahib çıxdı. Gözəl oyunla yadda qalan Türyan Məmmədovun kapitanı olduğu “Diplomat” komandası II yeri tutdu.